Un vixiante de seguridade do Hospital Álvaro Cunqueiro de Vigo tivo que ser atendido polas lesións que lle ocasionou un paciente psiquiátrico que se atopaba "moi alterado e facía caso omiso ás indicacións do persoal sanitario", segundo informou UXT. De acordo co sindicato, os feitos ocorreron na mañá deste luns, cando o vixiante intentaba convencer a este home "para que depuxese a súa actitude". Como consecuencia das lesións, o traballador atópase de baixa médica.
UXT destacou "a difícil función que prestan os vixiantes deste tipo de servizos", que chegan a pór "en risco as súas vidas". Ademais, denunciou que "son os grandes esquecidos polas administracións e a sociedade", a pesar de que "sempre están en primeira liña e son os primeiros en dar socorro ante calquera incidencia ou catástrofe".