O alcalde de Vigo, Abel Caballero, inaugurou este venres o aparcadoiro municipal xunto ao Hospital Álvaro Cunqueiro (HAC), que aínda que inicialmente será gratuíto para todos os usuarios, proximamente pasará a selo só para os vigueses. A pesar diso, asegurou que porá este aparcadoiro "gratis para todos os cidadáns de calquera lugar se a Xunta pon o seu gratis".
Así o comunicou en declaracións aos medios antes do acto onde, rodeado dunha gran comitiva, Caballero recordou que o estacionamento municipal ten "case 400 prazas" e tivo un custo de máis de medio millón de euros, que foi "pagado polos cidadáns de Vigo".
Segundo explicou, o Goberno local fixo o parking municipal porque rexeita "que a xente que vén a este hospital teña que pagar no aparcadoiro da Xunta, onde a xente se ve obrigada a aparcar porque non hai outro sitio, e en lugar de facer un aparcadoiro gratuíto, fixeron un de pago".
"Hai dous modelos de entender as cousas: O de Feijóo, que é obrigar a pagar o aparcadoiro, que é un copago á sanidade, porque non hai alternativa; e logo está o noso, que non se paga, valerá no seu momento coa PassVigo", recalcou, indicando que o parking seguirá sendo gratis para todos ata cambiar a ordenanza para limitar a gratuidade aos usuarios de PassVigo e facer pagar ao resto de cidadáns, aínda que segue aberto a negociar con outras localidades.
Acto seguido, fixo fincapé en que o Partido Popular "comprometeu que cando (o Concello) abrise o aparcadoiro gratuíto", poríase "gratuíto o da Xunta". "Espero que hoxe (por este venres) a Xunta o poña gratuíto, senón o PP de Vigo quedará absolutamente desautorizado, invalidado para ocupar un lugar na representación desta cidade". "É unha mentira flagrante, porque pensaron que non o fariamos; creron que non iamos en serio, pero nós sempre imos en serio", espetou, insistindo en que se a Xunta deixa de cobrar os aparcadoiros do Hospital, el porá o municipal "gratuíto para todos".
REACCIÓN DA XUNTA. A Xunta defendeu que o Álvaro Cunqueiro dispón de catro aparcadoiros cun total de 4.000 prazas, das que algunhas son gratuítas e as de pago teñen "o prezo máis barato de cantos existen nos hospitais públicos de Galicia, e o máis económico de cantos están abertos no municipio de Vigo".
Fronte a iso, manifestou que "está a esperar polas 2.824 prazas de aparcadoiro disuasorio municipal que estaban previstas na contorna do hospital e que se contemplaban no proxecto sectorial de 2008 que eran competencia do Concello de Vigo". "Lonxe dos datos anunciados, e tras tres anos de atraso, o Concello abre un aparcadoiro de 400 prazas", criticou.
