O alcalde de Vigo, Abel Caballero, confirmou este luns o envío dunha carta ao presidente da Xunta de Galicia, Alberto Nuñez Feijóo, solicitándolle oficialmente que retire a candidatura 'Illas Atlánticas Patrimonio da Humanidade' que enviou á Unesco.
Recibirán a mesma carta, explicou Caballero en rolda de prensa, todos os integrantes do Consello de Patrimonio Histórico Español, composto por un representante do Ministerio de Cultura e por un representante de cada Comunidade Autónoma. "Creo que a estas alturas a burla da Xunta de Galicia á Unesco, ao Consello de Patrimonio Histórico de España e ao Ministerio de Cultura é clamoroso", dixo Caballero, que cualificou a candidatura da Xunta como unha "tomadura de pelo", unha "pantomima" e "un golpe de man político para obstaculizar a de Cíes".
Caballero asegura que só Cíes cumpre os requisitos para ser Patrimonio da Humanidade
O rexedor vigués ha volto a incidir en que, de todas as illas que conforman o Parque Nacional das Illas Atlánticas (Cíes, Ons, Sálvora e Cortegada), só Cíes cumpre cos requisitos para ser Patrimonio da Humanidade. Para Caballero, a de Cíes "é unha candidatura da cidade de Vigo, e estar en contra desta candidatura é estar en contra de Vigo".
Así mesmo, Caballero engadiu que, do mesmo xeito que A Coruña ten a Torre de Hércules e Santiago a súa catedral e centro histórico, Vigo ten Cíes, e así remarcou que a da Xunta é unha "candidatura clandestina para destruír" a iniciativa do Concello.