O Concello de Vigo e a asociación Radiotaxi da cidade estudan a implantación dun novo modelo de taxi compartido, que estaría dirixido fundamentalmente á xente maior que vive nas parroquias do rural, e que teñen máis dificultades para acceder ao bus urbano.
Así o anunciou este venres o alcalde, Abel Caballero, quen explicou que se trata dunha proposta que consiste en que un taxi poida ser utilizado por varios usuarios que van na mesma dirección ou ao mesmo destino.
O rexedor explicou que, así mesmo, está a barallarse a posibilidade de que esas viaxes sexan bonificadas, con axudas "ás persoas, non ao taxi", e que se poida utilizar o cartón PassVigo como método de pago.
