A Audiencia de Pontevedra condenou a 25 anos e sete meses de cárcere a un home de Vigo por agredir sexualmente á súa parella, á que ademais atou e deixou encerrada no taller da vivenda que ambos compartían.
O tribunal considérao culpable dun delito de malos tratos habituais, agresión sexual, detención ilegal, lesións e revelación de segredos, segundo recolle a sentenza que difundiu o Tribunal Superior de Xustiza de Galicia.
Xunto coa pena de prisión, o acusado terá que pasar ademais cinco anos de liberdade vixiada cando salga do cárcere e manterse afastado da vítima durante 25 anos.
O fallo considera probado que o home maltratou de xeito habitual á súa parella, coa que comezou a relación cando ela tiña 15 anos, e coa que ten unha filla en común.
O sospeitoso, nunha ocasión, atouna cunha corda e deixouna encerrada no taller da vivenda que compartían en Vigo tras agredila sexualmente e sacarlle fotografías.
O condenado enviou as imaxes a través dunha aplicación de mensaxería instantánea a un home que a vítima tiña entre os seus contactos, quen, ao recibilas, alertou á Policía.
As maxistradas consideran que o testemuño da muller foi "sincero, contundente e convincente" e non aprecian nela "motivo algún" para dubidar da súa veracidade, xa que foi corroborado polos axentes que acudiron á vivenda e polos forenses.
Non observaron "contradicións" no seu relato salvo "certas distorsións" que aseguran que son "comprensibles" polo impacto que os feitos provocaron na vítima e que non afectaron a elementos "esenciais" das súas explicacións.
Ademais, a sentenza resalta que son "moi significativas, convincentes e corroboradoras" as declaracións dos policías que acudiron a auxiliala, que comprobaron a situación e o estado que presentaba a vítima, "revelador da situación que acababa de sufrir".
