O presidente da Xunta, Alberto Nuñez Feijóo, foi testemuña este venres do izado na praia de Rodas, nas Illas Cíes, da primeira das 155 bandeiras azuis que este verán ondearán en Galicia, que acreditan que a comunidade se mantén un ano máis "no podio do mundo". O acto de entrega de todas as distincións serviu para reivindicar que Galicia é un "destino seguro, de calidade e sostible", aínda que tamén acabou por convertido no centro dun cruzamento de reproches entre o Goberno autonómico e o Concello de Vigo.
Tras o evento, o rexedor, Abel Caballero, cargou con dureza contra o presidente galego por acudir a Cíes a izar unha bandeira azul que "é do alcalde de Vigo". "Asistimos a un esperpento da política co señor Feijóo nas illas Cíes", segundo o socialista, quen nunha mensaxe gravada enviada aos medios de comunicación dixo que a participación do presidente da Xunta neste acto é "a máis deleznable forma política de comportarse".
"A bandeira azul de Rodas, planteada polo Concello de Vigo, encargándose o Concello da vixilancia, do socorrismo, da limpeza, e o señor Feijóo, sen ter nada que ver con esa bandeira azul, ízaa, sácase unha foto e simula que é el quen conseguiu esa bandeira", recriminou o alcalde, que acusou o presidente da Xunta de ser "un caradura político".
"É patético ver o presidente da Xunta izar unha bandeira que corresponde a outra institución coma se fose da Xunta, coma se a conseguise el", continuou o rexedor, notablemente molesto. Segundo Caballero, el non tería ningún problema en cederlle a Feijóo "o dereito" a izar a bandeira, pero a Xunta nin o expuxo, xa que nin pediu permiso nin o invitou sequera, o que considera "lamentable".
As críticas do alcalde de Vigo tiveron rápida resposta por parte do Executivo autonómico, que afea ao rexedor que non asista á cerimonia como unha estratexia para buscar confrontación. "Se hai algún comportamento cuestionable neste caso é o do alcalde de Vigo. Primeiro, por non asistir ao acto a pesar da insistencia da Xunta para que acudise sen obter resposta; e, en segundo termo, por utilizar politicamente a súa ausencia premeditada para cargar contra o Goberno autonómico", dixo a delegada da Xunta en Vigo, Marta Fernández-Tapias, quen asegura que o rexedor debería explica por que non foi este venres a Cíes.
"¿Quizais para ter unha escusa para atacar de novo á Xunta?", preguntouse a delegada, que acusou a Caballero de absoluta "falta de lealdade e respecto" cara ao Goberno galego e cara ao resto de alcaldes que si acudiron a recoller as bandeiras.
"Caballero queda sen argumentos na súa estratexia de confrontación que basea en falsidades e mentiras e xa non convence a ninguén", engadiu Fernández-Tapias, antes de recordar que a xestión do Parque Nacional Illas Atlánticas de Galicia corresponde á Xunta e que ao Concello de Vigo unicamente o servizo de socorrismo no caso da praia de Rodas.
O presidente encomiou as Cíes, das que dixo que "contribúen a facer un camiño que proxecta a cidade e as illas coa forza dun fenómeno universal que está moi por enriba de calquera formulación pequena". A este respecto, referiuse aos 15 millóns de euros que a Xunta investiu no Parque Nacional Illas Atlánticas e aos 20 que investirá nos próximos anos apoiados nos fondos europeos para parques nacionais.
"Pedimos un maior esforzo do Goberno central e que teña en conta a singularidade dun parque insular. Porque hai poucos parques nacionais insulares en España", dixo o presidente, quen sinalou que a Xunta espera afianzar "proximamente" o recoñecemento xeneralizado ás Cíes na candidatura do Parque Nacional Illas Atlánticas á lista de Patrimonio da Humanidade da Unesco.
O presidente da Xunta recordou que desde o pasado 15 de maio 18.000 persoas visitaron xa as Cíes e Ons, e sinalou que "por ese motivo e polo futuro ambiental habemos de velar por protexer estas illas".
