Axentes da Policía Local de Vigo detiveron a un home de 32 anos de idade, O.P.G., por agredir ás camareiras dunha cafetería da cidade, e por intentar agredir e ameazar a varios axentes.
Segundo informaron fontes policiais, os feitos tiveron lugar na tarde do domingo, cando o 092 recibiu un aviso para acudir a unha cafetería da Avenida de Martínez Garrido.
Alí, un individuo presentouse moi alterado e con actitude violenta, molestando aos clientes, polo que os empregados do local negáronse a servirlle. O home meteuse por detrás da barra e chegou a agredir a dúas empregadas.
Cando chegou a Policía, conseguiran inmobilizalo entre varias persoas. Non entanto, o home mantivo a súa actitude agresiva e intentou golpear aos axentes, á vez que lles ameazaba e insultaba.
Dado que podería atoparse baixo os efectos dalgunha sustancia, a Policía trasladouno a un centro asistencial tras detelo.
INTENTO DE ROUBO. Por outra banda, a Policía Local tamén detivo o pasado fin de semana a un home de 32 anos de idade, D.A.G.M., natural de Vigo e sen domicilio coñecido, como presunto autor dun intento de roubo nunha vivenda unifamiliar na Avenida de Samil.
Unha dotación policial que se atopaba pola zona escoitou saltar a alarma da vivenda e achegouse ao lugar. Nese momento, alertado pola presenza dos axentes, o sospeitoso escapou da leira fuxindo a pé, descalzo e co torso espido.
Finalmente foi interceptado e, aínda que inicialmente asegurou que entrara no xardín da casa atraído polas flores, os axentes comprobaron que unha das persianas da casa fora forzada.