A Policía Nacional detivo en Madrid, como presunta autora dun delito de subtracción de menores, á nai de dúas nenas estranxeiras tuteladas pola Xunta de Galicia e que residían nun centro de menores en Vigo.
A investigación, segundo informaron este mércores fontes policiais, correu a cargo de axentes da Unidade de Atención a Familias e á Muller (Ufam) tras recibir información de que as dúas menores fuxiran do colexio onde cursan os seus estudos en Vigo, e non regresaran ao centro de acollida onde residen, na mesma cidade.
Os axentes entrevistáronse tanto cos responsables de colexio como do centro de acollida, onde lles explicaron a dificultade que as dúas raparigas teñen co idioma castelán, que nou teñen familia en Vigo e que están tuteladas pola Xunta, á espera de recibir a documentación pertinente por parte da nai.
Os axentes realizaron xestións en estacións de tren e autobuses, onde conseguiron imaxes que confirmaron que as menores, acompañadas dunha muller, tomaran un tren con destino á estación madrileña de Chamartín.
Un aviso á Comisaría de Policía Nacional da Estación de Chamartín, comunicando a desaparición e achegando datos das menores, serviu para localizalas xunto a unha muller que resultou ser a súa nai, tal e como se comprobou en dependencias policiais.
A nai foi detida por un presunto delito de subtracción de menores, mentres que as súas fillas foron trasladadas a un centro de acollida temporal da Comunidade de Madrid.
