Axentes da Policía Nacional da Comisaría de Vigo detiveron a unha veciña da cidade, de 49 anos de idade, como presunta autora dun delito contra a saúde pública por tráfico de drogas.
Segundo informaron fontes policiais, as investigacións iniciáronse tras a alarma dos veciños das zonas de Coia, Travesas e Florida, que detectaron unha constante trasfega de toxicómanos pola rúa Quintela e os seus adxacentes.
Ao establecer o dispositivo de vixilancia, os axentes decatáronse de que os compradores se citaban cunha muller, que adoptaba diversas medidas de precaución para non ser detectada e eludir a posible acción policial.
Finalmente, a Policía estableceu un operativo e detívoa, á vez que se procedeu ao rexistro do seu domicilio. Alí, os axentes atoparon "unha importante cantidade de cocaína, así como haxix e outras sustancias" listas para a súa venda, ademais doutros efectos utilizados para a preparación da droga.
A muller arrestada e as dilixencias practicadas foron postas a disposición do xulgado de instrución número 5 de Vigo, en funcións de garda.
