Axentes da Garda Civil detiveron en Vigo a un home de 38 anos como presunto autor dun delito de provocación e corrupción de sexual de menores a través de salas e foros de chats en internet nos que se facía pasar por un menor de idade para tratar de conseguir imaxes das súas vítimas.
As investigacións iniciounas o pasado verán a Garda Civil da comarca do Sobrarbe (Huesca) por mor da denuncia presentada polos pais dun menor que veraneaban na zona ao localizar no teléfono do seu fillo varios vídeos pornográficos, informa o instituto armado nunha nota de prensa. Nos vídeos aparecían outros menores aos que o detido enganara previamente para conseguir imaxes de contido obsceno coas que continuar coa súa actividade delituosa.
No marco da Operación Simbomba, os axentes iniciaron unha complexa investigación para tratar de dar co presunto corruptor, que concluíu coa identificación e detención do sospeitoso, que actuaba desde o seu domicilio en Vigo.
As fontes citadas sinalan que o detido servíase de nomes de usuarios falsos en foros de internet para gañar a confianza de menores, aos que propuña manter conversacións en privado por aplicacións de mensaxería instantánea coas que distribuía pornografía infantil ás súas vítimas. Con este material, o presunto corruptor trataba de convencer a outros menores para que lle remitisen vídeos gravados por eles mesmos, que despois almacenaba nos seus arquivos informáticos.
Unha vez coñecido o método empregado polo sospeitoso e seguido o seu rastro en internet, axentes da Garda Civil de Huesca auxiliados por efectivos da policía xudicial de Pontevedra procederon á detención do sospeitoso na súa vivenda. Durante o rexistro domiciliario, os axentes incautaron un computador portátil e un teléfono móbil dos que presuntamente se servía o detido para contactar coas súas vítimas.
O material pornográfico foi posto a disposición do Xulgado de Instrución nº 1 de Boltaña (Huesca) para o seu estudo. Tras prestar declaración, o detido foi posto en liberdade polo instrutor deste órgano xudicial con cargos por un presunto delito de provocación e corrupción de menores.
Desde a Garda Civil instouse a pais e titores a prestar atención á actividade que desenvolven os menores ao seu cargo a través de móbiles e de dispositivos informáticos.
