O HAC avisará por SMS da evolución das operacións

O Hospital Álvaro Cunqueiro de Vigo anunciou a próxima implantación dun novo sistema de aviso a través de mensaxes de texto para que familiares e acompañantes de pacientes que se someten a intervencións cirúrxicas poidan seguir a evolución das mesmas.

Esta plataforma de comunicación baseada no envío de SMS, explica o Sergas nun comunicado, ten como obxectivo "informar" aos acompañantes dos pacientes "sen que teñan que estar fisicamente na sala de espera durante a intervención", así como "mitigar a súa inquietude mentres esperan".

Enmarcada no Plan de Mellora e Escoita Activa que desenvolve a Eoxi de Vigo, esta medida contempla que as mensaxes de texto sexan enviados desde o propio computador do quirófano mediante a plataforma Avisa_me, polo que a comunicación é "directa e rápida".

O persoal autorizado para o envío tan só ten que introducir o número de contacto facilitado polo acompañante e escoller o tipo de mensaxe que se vai a remitir entre dous tipos: un para avisar de que a cirurxía finalizou e, o segundo, para confirmar que a intervención aínda segue o seu curso.

As primeiras probas do sistema comezaron a realizarse o pasado verán nalgunhas especialidades cirúrxicas. O sistema inaugurouse o 22 de marzo nas intervencións pediátricas e espérase que a súa implantación na totalidade da área cirúrxica do Cunqueiro estea lista ao longo das próximas semanas, tras o cal estenderase ao hospital Meixoeiro.