Un coche saíuse da vía na madrugada deste mércores na avenida de Lavadores de Vigo e acabou estrelado contra o peche dunha leira. O condutor deu positivo en drogas, resultou ferido e foi trasladado ao hospital. Trátase, segundo confirmou a Policía Local, de Samuel Fiuza, un dos implicados no atropelo mortal de 2008 no que pereceu unha parella.
Era o rival de Jorge Luis Sosa 'Makelele' na carreira de coches que acabou en traxedia e, de feito, foi condenado a tres anos e tres meses de prisión polo seu papel naquelas mortes. Algo menos da pena que se lle impuxo ao autor material daquel homicidio, Makelele, actualmente en prisión por matar ao seu pai.
En accidente de Fiuza deste mércores tivo lugar á 1.45 da madrugada no cruzamento de Lavadores con Estrada do Vilar. Sometéuselle ao test de alcoholemia e deu negativo, pero en cambio a proba demostrou que consumira drogas, xa que deu positivo en cannabis, cocaína e opiáceos.
