Axentes da Policía Local de Vigo detiveron a A.M.R.B., un home de 33 anos e nacionalidade nicaraguana, despois de que pegase á súa esposa por mor de que ela desenchufase un aparato reprodutor de música sen consultarlle.
Os feitos, segundo informaron este luns fontes policiais, tiveron lugar sobre as cinco da tarde do pasado sábado, momento en que a vítima chamou ao 092 para denunciar que acababa de ser agredida polo seu marido no piso de ambos, na rúa Conde de Torrecedeira.
Os axentes desprazados ao lugar entrevistáronse coa muller, tamén de 33 anos, e que, nun "elevado estado de nerviosismo" e con erosións no pescozo, relatou que, minutos antes, o seu marido estaba a escoitar música co volume do reprodutor moi alto, polo que lle pediu en varias ocasións que o baixase.
Como o seu marido a ignorou, a muller desenchufou o equipo, momento en que o home se levantou e, en presenza dos fillos de ambos, de 3 e 10 anos, e dun familiar, suxeitouna do pescozo e golpeouna contra a parede, dándolle na fronte varios golpes e ameazándoa con ser máis agresivo na próxima ocasión.
Por estes feitos, os axentes procederon á detención do marido como presunto autor dun delito de violencia de xénero.
