Un home de 58 anos foi denunciado administrativamente por conducir baixo os efectos da cocaína tras cometer unha infracción de tráfico en Vigo.
Fontes policiais detallaron que os feitos tiveron lugar este sábado sobre as 12,30 horas, cando os axentes deron o alto ao condutor dun vehículo despois de que cometese unha infracción de tráfico na Praza da Miñoca.
Ao entrevistarse co condutor, os policías observaron que presentaban indicios de atoparse baixo os efectos das drogas. Así, o home foi sometido á proba correspondente, que arroxou resultados positivos en cocaína, benzodiacepinas e outros fármacos.
Por este motivo, foi denunciado administrativamente e impúxoselle unha sanción de 1.000 euros, así como a retirada de seis puntos do permiso de condución.
Noutra orde de cousas, entre este sábado e este domingo contabilizáronse sete alcoholemias positivas. En concreto, cinco das probas realizáronse a condutores tras denuncias de tráfico e accidentes de circulación e en todos os casos superouse o límite penal establecido.
Ademais, outras dúas probas positivas cuxos resultados triplicaban o máximo permitido realizáronse no marco de senllos accidentes de tráfico. Un destes dous condutores tamén carecía de permiso de conducir, polo que foi denunciado pola suposta comisión de dous delitos contra a seguridade viaria.
Por outra banda, na tarde deste domingo, a Policía Local recibiu 60 chamadas de cidadáns que buscaban coñecer o modo no que o estado de alarma afecta á mobilidade.
