Dúas persoas foron hospitalizadas este mércores como consecuencia dun accidente múltiple na A-55 no que se viron involucrados dous turismos e un camión.
O suceso, segundo o 112, tivo lugar sobre as 14.30 á altura do km 17 da A-55, ao seu paso pola parroquia de Torneiros, en dirección Vigo.
Varias testemuñas do accidente solicitaron axuda ao detectar que dúas persoas estaban feridas, polo que o 112 mobilizou ao 061 e puxo sobre aviso aos Bombeiros de Porriño, á Garda Civil de Tráfico, á Policía Local, a Protección Civil e ao servizo de mantemento de estradas.
Os profesionais sanitarios que acudiron ao momento trasladaron aos dous feridos, que estaban liberados e accesibles, ao hospital Álvaro Cunqueiro. Froito do accidente formáronse retencións de varios quilómetros na autovía.
