A Garda Civil, en colaboración coa Confraría de Pescadores de Baiona, interceptou no municipio pontevedrés de Nigrán un vehículo que transportaba 52 quilos de centolas sen ningún tipo de documentación.
Segundo relatou o Instituto Armado, a actuación produciuse o pasado venres cando unha dotación do Servizo de Vixilancia Pesqueira da Confraría de Pescadores de Baiona solicitou o apoio da Garda Civil para interceptar un vehículo que saíra do peirao de Baiona cun cargamento de centolas, supostamente indocumentadas.
O Posto Principal da Garda Civil de Baiona-Nigrán activou entón o protocolo de colaboración e instantes despois unha patrulla de seguridade cidadá puido interceptar o turismo en Nigrán á altura da Ramallosa.
Ao inspeccionar o vehículo púidose comprobar que este transportaba 52 quilos de centollas "sen ningún tipo de documentación, das que algunhas non alcanzaban as medidas regulamentarias", destacaron as mesmas fontes. As dúas persoas que viaxaban no vehículo, que resultaron ser dous irmáns veciños de Baiona, foron identificados e denunciados por infrinxir a Lei de Pesca de Galicia. Así, procedeuse á incautación do marisco que foi posto a disposición do Servizo de Gardacostas en Vigo.
