Axentes do Corpo Nacional de Policía detiveron in fraganti a un home que distribuía droga no barrio de Coia, en Vigo, e ao que se lle interveu unha "importante cantidade de cocaína" e diñeiro en efectivo no momento da súa detención.
Segundo informou a Policía Nacional, a finais do mes de xaneiro axentes da Comisaría de Distrito Travesas, pertencente á Comisaría de Policía Nacional de Vigo-Redondela, iniciaron unha investigación tras ter coñecemento da posible existencia dun punto negro de venda de drogas na zona de Coia-Castelao.
No transcurso das pescudas, os efectivos policiais comprobaron que había unha constante trasfega de toxicómanos pola rúa Esturáns e as contiguas. Así, os compradores esperaban en distintos puntos ata que chegaba un home co que realizaban un rápido intercambio antes de marcharse.
A partir destes feitos, elaborouse un dispositivo policial polo que, na tarde deste mércores, os efectivos abordaron a este home no momento en que realizaba un rápido intercambio con outro individuo.
Ambos os homes foron identificados e realizóuselles un cacheo de seguridade polo que ao vendedor intervéuselle "unha importante cantidade" de cocaína, ademais de diñeiro en efectivo. Por este motivo, procederon á súa detención por un delito contra a saúde pública.
O home, veciño de Vigo de 30 anos de idade, que xa contaba con cinco antecedentes policiais, quedou a disposición do Xulgado de Instrución número 6 de Vigo, en funcións de garda.