Dúas persoas tiveron que ser trasladadas ao Hospital Álvaro Cunqueiro de Vigo con síntomas de intoxicación provocada, posiblemente, pola mala combustión dun braseiro. Segundo informa o 112 Galicia, o suceso ocorreu nunha vivenda da rúa do Cacheno, na parroquia viguesa de Bembrive, sobre as 5.30 horas deste mércores.
Sobre esa hora, persoal do 061 indicaba ao 112 que unha ambulancia se dirixía ao domicilio por unha posible intoxicación de gas. A partir de aí, os xestores de urxencias deron o aviso aos Bombeiros, á Policía Local e a Protección Civil. Tamén foi informado o persoal da empresa subministradora do gas que abastece a zona.
Unha vez no lugar, e logo de facer as correspondentes medicións, os Bombeiros confirmaron que a intoxicación foi provocada por un braseiro, segundo indica o 112.
Tamén este mércores, unha persoa tivo que ser trasladada a un centro sanitario por inhalación de fume tras producirse un incendio na súa vivenda en Muros. As chamas calcinaron unha cama, un cabeceiro e un armario dunha das habitacións.
Segundo informa o 112, o sinistro rexistrouse no lugar de Serres sobre as 8.30 horas. Foi un particular quen chamou para alertar de que saía fume por unha fiestra da vivenda. A central de urxencias puxo en alerta ao GES de Muros, aos Bombeiros de Cee e á Garda Civil. Así mesmo, avisouse ao 061.
Unha vez no lugar, os membros do GES solicitaron ao 112 asistencia médica para unha persoa que tiveran que sacar do interior da vivenda e que inhalara moito fume.
