O festival O Marisquiño celebrará en 2021 unha edición "de transición", na que a prioridade será "a seguridade de deportistas, traballadores e público" e na que, por primeira vez nun evento deste tipo, farase unha aposta pola "criptoarte" en formato NFT (Token Non Funxible) coa posta en marcha dunha plataforma de venda de obras de arte dixitais.
Os organizadores do certame presentaron este xoves as principais novidades e a imaxe gráfica do evento, que se celebrará na zona do Náutico e Montero Ríos de Vigo entre o 6 e o 8 de agosto. O cambio fundamental con respecto a outras edicións será a ausencia de grandes aglomeracións, xa que as probas e eventos concentraranse en catro áreas pechadas, que funcionarán como "espazos-burbulla".
// CARTEL NFT PARA #OM21 //
Presentamos imagen de O Marisquiño 2021, que será exclusivamente digital y tendrá por primera vez en la historia del festival 😎 certificado #NFT que permitirá subastarlo con fines benéficos 🤟
🔗 Toda la info https://t.co/vPWbkzAuYK pic.twitter.com/RAxPG0n7s4— O Marisquiño (@omarisquino) May 27, 2021
Así, instalaranse esas zonas no peirao de Transatlánticos (para a disciplina de skate), fronte ao Real Club Náutico (BMX), na Praza da Estrela (basket e break) e en Cánovas do Castelo (para a proba de descenso). Para acceder ás mesmas será necesario adquirir unha entrada, que será gratuíta, personalizada e intransferible.
"Fóra deses espazos non vai haber nada. A idea é que só acuda a xente que teña entrada", sinalou Joako Ezpeleta, director do festival, en alusión á ausencia de postos de comida ou bebida, de venda de camisetas, e outros atractivos que, ata a chegada da pandemia, completaban a oferta do Marisquiño.
O festival fai unha aposta pioneira pola "criptoarte" en formato NFT e presenta un cartel virtual
En cada un dos espazos das probas (que estarán pechados para impedir a visión desde o exterior) o público estará sentado, coa máscara posta, sen comer nin beber, e separado pola distancia de seguridade adecuada. Deste xeito, os aforamentos serán limitados, aínda que a organización non concretou polo momento o número de entradas que estarán dispoñibles, xa que aínda se está traballando coas autoridades sanitarias para determinar eses detalles, en función da evolución da pandemia.
Á marxe das cuestións de aforamento e limitacións pola pandemia, a principal novidade do Marisquiño 2021 será a súa aposta pola arte en formato dixital ou "criptoarte", cunha iniciativa pioneira: o festival contará cun cartel virtual deseñado e animado por Kike Besada e Marcos Mosquera.
A imaxe, coas letras OM e o ano 2021, transmite unha aparencia de glitch, é dicir, un erro que altera un produto dixital sen estragalo, como cando se ve unha imaxe pixelada ou temblorosa. Este concepto, explicou Marcos Mosquera, pretende transmitir a idea de que, tras un ano de pandemia no que non se puido celebrar o festival, este se "resetea" nun "novo comezo".
O cartel desta edición non se vai a imprimir en papel, pero si poderá adquirirse a través dunha plataforma de markertplace de arte posta en marcha polo Marisquiño, Opensea. Así, as persoas que o desexen poderán facerse cunha unidade limitada do cartel en formato NFT, a un prezo de 50 euros cada unha. Os beneficios obtidos destinaranse á Fundación Dani Rivas para o seu proxecto de bolsas a mozos deportistas.
A plataforma Opensea porá tamén á venda outras obras de arte dixitais, a partir de fotografías e pezas audiovisuais que se elaboren no propio festival.
Ademais, O Marisquiño converterase este ano no primeiro festival de deporte urbano que dea aos deportistas gañadores das probas a posibilidade de cobrar os seus premios en criptomoeda.
