Efectivos da Policía Local de Vigo instruíron dilixencias xudiciais a un home de 48 anos de idade, nacido en Cuba e domiciliado na cidade, que foi interceptado ao volante baixo os efectos do alcol despois de que pedise axuda aos axentes para atopar o seu vehículo porque "ía bébedo" e non recordaba onde aparcara.
Segundo informou a Policía Local de Vigo, os feitos ocorreron sobre as 3,00 horas deste venres, cando unha patrulla que circulaba pola rúa Couto de San Honorato foi requirida por un individuo que presentaba signos de consumir bebidas alcohólicas.
O home pediu axuda para atopar o seu vehículo, do que facilitou a súa marca e número de matrícula, e manifestou que "como ía bébedonon recordaba onde o estacionou". Entón os axentes advertíronlle que en caso de atopar o seu vehículo abstivésese de conducir nese estado.
No entanto, pasados uns minutos os axentes sorprenderon a este home ao volante do seu vehículo, polo que lle deron o alto e realizáronlle a proba de alcoholemia, na que deu positivos de 0,86 e 0,74 mg/l de aire expirado. Por estes feitos instruíronselle dilixencias xudiciais por un delito contra a seguridade viaria.
