O Xulgado do Mercantil 1 de Pontevedra acollerá o vindeiro luns unha vista previa relacionada coa causa aberta contra a concesionaria da AP-9, Audasa, polo presunto cobro abusivo de peaxes durante a ampliación da ponte de Rande.
Á mesma acudirá en representación dos consumidores afectados a asociación En-Colectivo, unha das entidades que se adheriron á demanda da Fiscalía de Pontevedra contra a concesionaria, segundo confirma nun comunicado.
En-Colectivo avanza que trasladará ao xulgado probas que avalan a lexitimidade das reclamacións dos afectados, que solicitan a devolución do importe das peaxes cobradas, consideran que indebidamente, durante as obras de ampliación da ponte de Rande.
Alegan que Audasa optou por seguir cobrando a totalidade do importe das peaxes a pesar de ofrecer aos seus usuarios "un servizo deficiente, que non garantía nin a seguridade nin a velocidade requiridos a unha autoestrada".
O Xulgado do Mercantil 1 de Vigo, que hai cinco meses desestimou a petición de Audasa de que se tramitase esta causa pola vía do contencioso-administrativo, e non a civil, admitiu a trámite en decembro de 2018 a demanda de xuízo ordinario presentada pola Fiscalía.
Na súa demanda colectiva, a Fiscalía de Pontevedra solicita o reintegro das peaxes que foron abonadas no tramo da contorna da ponte de Rande entre o 27 de febreiro de 2015 e o 1 de xuño de 2018, cos intereses legais.
A Fiscalía interesa que se dite unha sentenza que declare a nulidade do cobro íntegro das peaxes durante ese período e condene a Audasa a cesar nesta práctica e a absterse de utilizala en diante en calquera autoestrada que xestione en España.
Na descrición dos feitos que xustifican a demanda, a Fiscalía fai constar que durante polo menos tres anos, entre o 27 de febreiro de 2015 e xuño de 2018, a execución de obras na contorna da ponte de Rande "afectou de forma relevante e constante" á fluidez do tráfico na autoestrada.
Abunda en que o tráfico se viu "permanentemente afectado", dado que a redución do número de carrís en uso e dos límites de velocidade, ademais das sucesivas tarefas de execución das obras, implicaron constantes atascos.
Xa que logo, considera que todos os vehículos que circularon nese tramo entre as datas indicadas "recibiron un servizo da autoestrada con insuficientes condicións de fluidez e seguridade".
Ao descoñecer a totalidade de consumidores afectados pola "práctica xeral abusiva" de Audasa, a Fiscalía solicita a extensión dos efectos da sentenza a todos os usuarios que se puidesen atopar na mesma situación.
Remítese aos datos da propia Audasa do período de referencia, que cifra nuns 77 millóns os tránsitos e a recadación por peaxes correspondente a vehículos lixeiros de ao redor dos 90 millóns de euros.
A Fiscalía de Pontevedra recalca que o pago da peaxe ten o carácter de contraprestación porque se entrega a cambio de recibir o uso "en perfectas condicións" de fluidez, velocidade e seguridade dunha vía de alta capacidade.
En base a este criterio, a demanda cualifica de "abusiva" a práctica consistente na esixencia da totalidade do importe do mesma peaxe que cando a autoestrada funciona de modo normal, aínda cando a concesionaria tiña "completa constancia" de que entón non podía prestar o servizo en tales condicións.
