O vicepresidente da Xunta, Alfonso Rueda, cre que "non hai que pór o foco" nos organizadores do festival O Marisquiño polo accidente ocorrido, "porque loxicamente se estes organizadores fixeron o concerto é porque alguén llo autorizou".
De tal forma, considera que "é necesario saber se a autorización do concerto, que foi do Concello, se fixo facendo todas as comprobacións necesarias", "sabendo ademais que o lugar no que se quería facer xa tivera moitos avisos anteriores de que non estaba en condicións adecuadas".
A preguntas da prensa, Roda sinalou que "o alcalde de Vigo di que deu autorización o Concello porque había informes técnicos que din que o avalaban". "O lóxico é que estes informes, cando xa van catro días do accidente, xa se coñecesen, e o certo e verdade é que non se coñecen", censurou.
Por iso, considera que mentres non se coñezan (os informes) a dúbida de se realmente o Concello fixo o que tiña que facer ou non siga no aire".
Neste sentido, ve "lóxico" que os afectados presenten denuncia, pois "moitos explicaban que a razón" para facelo é que se saiban as causas" e "como foron as autorizacións para evitar que se volva a repetir".
"O fundamental é saber que pasou para evitar que volva pasar", sentenciou. Así mesmo, recorda que é un proceso xudicializado, polo que "ao final terá que ser o xuíz o que determine responsabilidades".