Imprimir

Galicia aspira a "reforzar" os lazos con Arxentina coas bolsas para mozos

AGN / Agencias | 21 de septiembre de 2019

Feijóo visitou a exposición xeográfica 'O Camiño de Santiago'. EP
Feijóo visitou a exposición xeográfica 'O Camiño de Santiago'. EP
Destaca as axudas para que familiares de emigrantes cursen aquí estudos de FP ou universitarios

O presidente da Xunta puxo termo este sábado á viaxe institucional que desde o pasado domingo día 15 o levou a percorrer varias cidades arxentinas para abordar os retos da flota galega, ademais de promocionar o Xacobeo 2021 e de protagonizar diversos encontros con emigrantes. Nunha cita coa diáspora en Mar de Prata, Alberto Núñez Feijóo apostou por reforzar o vínculo "interxeracional" a ambos os lados do Atlántico a través dos programas e bolsas que o Goberno galego ofrece aos mozos fincados no estranxeiro. Como proba desta vocación aperturista, recordou que este ano 150 mozos cursarán un máster nas universidades galegas grazas á liña de bolsas Excelencia Mocidade Exterior.

Para os interesados na Formación Profesional de grao superior, apuntou á convocatoria de cen axudas de 10.000 euros en cada caso para vir a Galicia a cursar estes estudos. "En definitiva, queremos que os mozos galegos do exterior teñan a oportunidade de vir vivir experiencias e formarse", proclamou o titular da Xunta.

Froito dos lazos existentes entre a comunidade e Arxentina, Feijóo congratulouse de que Mar de Prata sexa estes días a capital cultural da Galicia exterior coa mostra Rosalía, de José Solla, e a exposición itinerante do fotógrafo monfortino Manuel Valcárcel dedicada ao Xacobeo. Durante a visita a esta última, explicou que o Ano Santo 2021 constitúe unha oportunidade para que os galegos "mostren a Galicia familiar, verde, innovadora e nova". "Queremos dar a coñecer que un dos pobos máis antigos de Europa é hoxe tamén un dos máis innovadores", afirmou.

Ademais de facer fincapé en que a celebración do Xacobeo 2021 plasmarase en celebracións e accións que se estenderán por toda a comunidade, o mandatario lanzou a mensaxe de que os galegos están "desexosos de recibir" a quen buscan "no antigo fin da terra un principio reconfortante e unificador".

Tras destacar que, como "depositarios da cultura do Camiño", os emigrantes galegos contribuíron "ao desenvolvemento" de Arxentina, o presidente asegurou que "a suma das identidades multiplica a forza dos pobos". Por iso, puxo en valor o feito de que entre o millón de peregrinos que chegan á comunidade cada ano hainos de 180 países. "O camiñante trae a súa cultura e leva a nosa, de forma que a peregrinación a Santiago, unida á peregrinación a América fixo de nós un pobo sen fronteiras", abundou.

Podes ver este artigo na próxima dirección /gl/articulo/galicia/galicia-aspira-reforzar-lazos-arxentina-bolsas-jovenes/201909212353121053021.html


© 2019 Diario de Pontevedra

Lepanto 5, Pontevedra

Tlfno: 986 011 100

(Grupo El Progreso)