Luís Bará esixe en Marín repatriar a mariñeiros que faenan en caladoiros internacionais

Preciosu que estas persoas "non teñen autorización" para volver aos seus domicilios nin tampouco para trasladarse aos lugares de pesca
Luís Bará, con outros membros do partido en Marín. BNG
photo_camera Luís Bará, con outros membros do partido en Marín. BNG

O candidato do BNG por Pontevedra, Luís Bará, esixiu ao Goberno central e á Xunta de Galicia que activen un operativo conxunto para repatriar e trasladar a destino aos mariñeiros galegos que faenan en caladoiros internacionais.

Tras un encontro en Marín con mariñeiros galegos que traballan habitualmente nas frotas do Atlántico Sur, Bará explicou que con motivo da crise sanitaria da covid-19 estas persoas "non teñen autorización" para volver aos seus domicilios nin tampouco para trasladarse aos lugares de pesca.

Un operativo similar "foi posible", lembra o candidato nacionalista, para que turistas españois puidesen regresar ao seu país, polo que entende que "con máis razón" hai que facelo con persoas que están a traballar fóra de España.

A situación que viven os mariñeiros do Atlántico Sur e outras zonas como o Pacífico ou o Índico está a crear "graves problemas económicos" porque moitas delas levan meses "no dique seco" e non teñen ingresos para afrontar as súas hipotecas e os seus gastos diarios.

"Hai que repatriar aos que xa levan alí nalgúns casos seis ou sete meses e necesitan volver a casa", sinalou Luís Bará, que tamén reclamou un plan "para os que están aquí en terra e levan moito tempo parados" sen xerar ingresos.

Bará recoñece que a solución é "complexa" polas diferentes situacións laborais dos mariñeiros, no seu maior parte traballadores de empresas de fóra de Galicia con diferentes tipos de contrato, pero pediu ás autoridades que lles busquen "algún tipo de axuda".

A Xunta de Galicia, engadiu o candidato do BNG, debe poñerse "ao choio" xa que ata o de agora "estivo desaparecida cando a xente do mar máis o necesita".

Comentarios