Dunha máquina da verdade moi atolondrada ata un sorteo da lotería do máis accidentado, pasando pola actuación dun particular Combo ou a recreación da Gladiator Race, para todo houbo sitio este venres á noite en Pontevedra. Nin o frío nin o risco de chuvia puido coas ganas de troula das dez agrupacións que participaron na XXVI Mostra da Parodia, a actividade que leva a distintos colectivos a parodiar cuestións de actualidade (ou non tanto) en interacción directa co público.
Os do Val do Lérez estiveron na Praza de España; Vamos a Todo, nos Soportais da Ferrería; Amoriños de Bora, na Praza da Peregrina; Os das Pistas, diante de Casa Alcalde, e a Asociación Recriativa de Xeve, no cruce entre as rúas Michelena e Gutiérrez Mellado. O programa completouse coa proposta de O Desenterro en Curros Enríquez; Equipo Ja na Praza de Ourense; Paquita la del Barrio y sus mariachis na Alfándega; PTV en Manuel Quiroga, e Las Flores del Carnaval na Praza da Ferraría. Estaba previsto que os premios ás mellores caracterizacións se entregaran arredor das 01.00 horas.
O Concello reparte 5.400 euros entre os premiados nesta Mostra: 1.300 van para o primeiro clasificado; 1.000 para os dous segundos, e 700 para os tres terceiros.
A programación municipal do Entroido péchase este sábado coa queima do Ravachol. O Concello mantiña este venres a previsión de celebrar todos os eventos á espera de ver como evolucionaba a previsión meteorolóxica. Ademais dos tradicionais velorio (a partir das 18.00 horas na Praza da Verdura) e incineración (pasadas as 21.30 horas na Praza da Ferraría), este sábado está previsto se celebre a que sería a primeira actuación a pé de rúa de diferentes murgas (13.00 horas).