Renfe prescinde do tren hotel entre críticas de Bloque e sindicatos

A operadora descarta recuperar o servizo polo menos no curto prazo trala súa paralización polo estado de alarma
Un tren hotel. ARCHIVO
photo_camera Un tren hotel. ARCHIVO

A decisión de Renfe de non volver poñer en circulación o seu tren hotel unha vez se recupere o tráfico ferroviario habitual tralo estado de alarma está a xerar polémica polo territorio, e especialmente en Galicia. É que afectan á comunidade as dúas conexións internas que estaban operativas en España: a Madrid-A Coruña, Pontevedra e Ferrol; e a Barcelona-A Coruña e Vigo. Só existía outro servizo con tren hotel, entre Madrid e Lisboa. 

Coñecida a determinación de Renfe, as primeiras críticas proceden de sindicatos e do BNG, que presentou este mércores unha proposición non de lei no Congreso para esixir ao Ministerio de Transportes a recuperación "de forma inmediata" do servizo. 

A operadora descarta recuperar, polo menos no curto prazo, estes trens apelando a criterios económicos, ás novas normas de seguridade e hixiene e ao impacto que a crise sanitaria provocada polo coronavirus está a ter no sector do transporte. Atendendo aos seus datos, Renfe rexistraba unha perda anual duns 25 millóns de euros pola prestación do servizo de tren hotel. Isto podería supoñer a definitiva desaparición deste histórico servizo nocturno. 

O Bloque esixe a súa recuperación "inmediata" e a CGT cuestiona a decisión nun contexto no que se fomenta este medio como alternativa ao avión

Neste contexto, o deputado do BNG no Congreso, Néstor Rego, asegurou que a situación de alerta que vive o país non pode ser aproveitada para continuar co "proceso de desmantelamento dos servizos ferroviarios e do seu carácter público", sobre todo no caso da comunidade galega.  

Xa no mes de outubro, o Bloque trasladou críticas de usuarios cando Renfe pretendía cambiar os trens hoteis por talgos máis vellos, con "máis atrasos e deficiencias nos traxectos".

Tamén o sindicato CGT censurou a decisión de "minguar" a conexión ferroviaria entre Galicia e o resto do territorio, utilizada por "miles de persoas" ao unir puntos "tan importantes" como Ponferrada, Astorga, León, Palencia, Burgos, Zaragoza, Tarragona, Barcelona e Madrid. 

Denuncia que con esta medida Renfe deixa "só un tren diurno entre Barcelona e Galicia, cunha duración de viaxe total de 12 horas", no que entende que é parte dunha campaña de "degradación" dos servizos nocturnos emprendida durante anos. Ademais, o sindicato contrapón esta medida coas actuacións ferroviarias noutros países europeos, que están a potenciar os trens hotel como alternativa aos avións no marco do plan contra o cambio climático da UE.

Comisións Obreiras advirte de que a medida implicará a perda de empregos

CC.OO., pola súa banda, advirte do impacto da supresión do servizo no emprego, xa que calcula que implicará a perda duns 46 postos de traballo directos en Galicia, e acusa a Renfe de utilizar "criterios economicistas" para executar o recorte. 

A central reivindica a especial utilidade deste servizo para a comunidade "mentres non se reducen os tempos de viaxe" a través da liña de alta velocidade e pide unha aposta "decidida" polo ferrocarril "como servizo público". Por todo iso, chama á Xunta a instar ao Goberno a manter uns trens "fundamentais" para Galicia.

Comentarios