O edil de Medio Ambiente de Sanxenxo, Juan Deza, deu conta este venres do investimento nas praias de Sanxenxo durante a tempada alta, que vén de rematar, e que supuxo un desembolso total de 964.018 euros das arcas municipais. Segundo o concelleiro, máis do 25% foron gastos derivados da covid-19.
As praias do municipio contaron este ano con 79 socorristas, dos cales 18 foron xefes de posto, con 35 informadores e 25 persoas encargadas da limpeza, estas últimas a media xornada. Deza salientou que o gasto do Concello por socorrista roldou os 2.000 euros, con salarios entre os 1.300 e os 1.500 euros aproximadamente. "O Concello contratou 139 persoas, non creo que haxa empresa en Sanxenxo que contrate tanto persoal xunto en tempada de verán», valorou o concelleiro.
Cada módulo de salvamento contou con "abundante material sanitario", entre os que salientan os catro drons mercados este ano polo Concello para o control de aforo, 17 desfibriladores, dúas embarcacións tamén provistas de desfibriladores e material específico anticovid. Emisoras, megáfonos, tensiómetros e equipos de osíxeno completan o arsenal sanitario das praias sanxeninas, no que este ano o Concello investiu un total de 128.924 euros, na compra e reposición de material a maiores.
Os areais de Sanxenxo contaron este ano con 79 socorristas
DOBRE EQUIPAMENTO. Ademais do material sanitario, Sanxenxo tivo que facer este ano un dobre esforzo en materia de equipamento e servizo nas praias do municipio. Esta tempada o Concello investiu 328.447 euros, case o dobre que nos anos anteriores. Deste total, 181.585 euros de gasto tiveron que ver coas tradicionais tarefas de posta a punto das praias, balizamento, e a instalación de tres novos módulos de baños en Area de Agra, Baltar e Montalvo, e dúas torres de vixilancia para A Lapa e Nosa Señora, que estrearon bandeira azul.
Os outros 154.270 euros, case a metade do investimento total nesta área, foron gastos derivados da situación sanitaria da covid-19 que tiveron que ver co equipamento. Neste sentido, Sanxenxo instalou 35 carteis informativos nos areais (12.000 euros), 540 metros de pasarelas (12.024 euros) e levou a cabo a mellora de varios accesos, coma o de Montalvo, Canelas, Bascuas, Foxos, Nosa Señora e Nanín (59.701 euros).
O gasto máis significativo tivo que ver co incremento na frecuencia da limpeza dos baños dos areais, que pasaron de realizarse dúas veces ao día en situación normal, a seis veces. "Cada hora e media limpabamos e desinfectabamos os baños, e todos estiveron provistos de hidroxel e de secadores de mans. Triplicouse a limpeza, e tamén o investimento". Así, Sanxenxo pasou de gastar 22.000 euros neste servizo aos 70.545 euros investidos este ano.
O Concello baralla presentar a candidatura da praia de Nanín ás bandeiras azuis
VINDEIROS RETOS. Juan Deza explicou que, unha vez que "estamos chegando ao top" en materia de bandeiras azuis, o vindeiro ano "xa non será coma antes, que en cada tempada podiamos conseguir unha ou dúas máis. Será máis difícil, temos que manter o conseguido, que non vai ser fácil, e seguir mellorando os servizos".
No punto de mira do Concello está a praia de Nanín, que, "a pesar de dous problemas puntuais nas analíticas coas choivas de agosto, dá bos resultados". Así, o Concello plantéxase presentar a súa candidatura ás bandeiras azuis o vindeiro ano. Deza tamén anunciou a intención de dotar ao areal de Pampaído de "mellores servizos e accesos" de cara á presentación da súa candidatura, pero xa para "o vindeiro mandato".
A praia da Carabuxeira tamén se verá impulsada nos próximos meses, nos que comezará a primeira fase de aportación de 10.000 metros cúbicos de area, e o edil de Medio Ambiente estima que "para o verán que vén poderá estar rematada a rexeneración", tras a segunda fase de aporte de 25.000 metros cúbicos máis de area.
A senda polo litoral da ría de Arousa, dende A Revolta ata o límite de Meaño, tamén será unha realidade próximamente: "Intentaremos facer unha gran senda nesa parte da costa de Sanxenxo que é a grande esquecida".
Sanxenxo conta tamén con seis sendeiros azuis que suman 25 quilómetros, "o maior de España". Os dous portos deportivos tamén teñen bandeira, "unha no Club Náutico e outra na Telleira", e o concello conta cun recoñecemento "ao salvamento e ao socorrismo".
Ademais, as praias de Areas, Panadeira, Silgar, Baltar, Caneliñas, Canelas, Montalvo, Pragueira, Major, Foxos, A Lapa e Areas Gordas contan co distintivo Q de Calidade.
