ÁS VECES, nalgún momento de relax, cando estamos discutindo na Redacción propostas para preguntarlle aos ciberusarios, sempre se nos ocorre algunha 'friquienquisa', desas que sabes que non podes/debes preguntar pero que che permiten un intre de risas: canto tardará o político X en cambiar de garavata, quen será o primeiro partido en romper un pacto, etc. Ultimamente, eu aposto por unha, que cada día vai medrando en opcións: que tema da actualidade de agora o aburre máis? E digo que o asunto incha porque cada día ocórreseme un novo. Parece que o verán queceulle as neuronas a máis dun e hai unha competición por ver quen marea máis a perdiz e quen dá máis voltas e voltas e voltas e voltas arredor de algo sen saír cunha solución. Cando pensabamos que a apelación continua a "las gentes" do dosificado Pablo Iglesias xa estaba superada, chegan os gregos e nos teñen un insufrible mes e medio dándolle voltas a un plan para, finalmente, aceptar o primeiro. E despois, aparecen os soberanistas cataláns rizando o rizo: vou ir na lista pero non para que me votes, semella que din Artur Mas e Oriol Junqueras. Realmente pensan que tanta volta e reviravolta vainos interesar dende o principio ata o final, sen que rematemos máis que fartos? Por que carallo non se van de vacacións dunha vez?... Ai, non, que despois empezarán coas eleccións. Ai, Deus!!!
Buscar
Servicios
El Grupo
Comentarios