XA NON falo de que se poñan dacordo para gobernar ou que nos fagan volver votar o día de Nadal -algo próximo ao pecado mortal- mais a imaxe que transmiten algunhas das súas señorías no Congreso é para anoxarse. Dá igual que sexa calquera sesión ordinaria ou o debate de investidura, días importantes nos que se decide o futuro do país, a actitude de moitos dos nosos representantes vai ser igual de maleducada e indigna da confianza depositada.
Algúns directamente non están nos seus asentos, algo ao que xa nos teñen acostumados e que xustifican con múltiples xestións fóra do sillón, mais os que están deberían mostrar algo máis de respecto por quen teña a quenda da palabra. Mentres un fala (dá exactamente igual a cor política, comprobeino onte pola mañá ao ver uns minutos o debate), os demais non son capaces de escoitar, de finxir que están a atender, aínda que sexa por amosar un mínimo de interese. Semella que os cidadáns estamos a desexar velos marmullar, ver como se mostran cousas divertidas nos móbiles os uns aos outros ou buscarlle os tres pés ao iPad.
De verdade, non poden facelo mellor? Para iso lles pagamos o soldo?
