GIORGIA MELONI ten gancho. Con ese nome podería ser o que quixese: musa de Fellini, astronauta, diva da canción lixeira, cabareteira, portada da Playboy e mesmo primeira ministra italiana. Meloni, ademais de ter un nome atractivo, é de ultradereita. E comparte vídeos danzando con dous melóns á altura dos peitos. Teno todo para seducir os idiotas.
Está claro que o naming é moi importante. Estou seguro de que se me chamase Héctor Cobra, como un día me rotulou por erro a TVG, hoxe estaría, canto menos, dirixindo un ministerio. Pero chámome Héctor Cobo, que ten menos gancho. E nin tan sequera me gusta o melón.
