Acaba de cumprirse un ano da detención en Polonia do xornalista español Pablo González, acusado de espionaxe pola Axencia Polaca de Seguridade Interior, un organismo creado no ano 2002 e responsábel de identificar, previr e combater as ameazas á seguridade interna do Estado e a súa orde constitucional, e en particular a soberanía, a independencia e a inviolabilidade do seu territorio. Esta Axencia acusou a Pablo González, fillo de pai ruso e nai española, e con dobre nacionalidade, de usar a súa profesión co ánimo de enmascarar actividades favorecedoras para a intelixencia militar rusa mentres cubría profesionalmente a chegada de refuxiados de Ucraína a Polonia, tal como recoñeceu no seu día un voceiro do Goberno polaco.
O certo é que o caso da detención e encarceramento do xornalista español, de orixe materna vasca e traballador sobre o terreo para importantes medios de comunicación televisivos e de prensa española, xa foi denunciado por diversas asociacións, federacións e sindicatos internacionais de xornalistas, dende a Federación Europea e Internacional de Xornalistas, ou a Federación de Asociacións de Xornalistas de España, até organizacións tan recoñecidas como Reporteiros sen Fronteiras e diversas entidades Pro Dereitos Humanos de varios países. Nos ámbitos profesionais do xornalismo europeo o caso de Pablo González –un ano xa en réxime de illamento penitenciario (prisión preventiva) e sen perspectivas de xuízo en tempo e forma– causa verdadeiro asombro.
E tanto é así que Amnistía Internacional ve moi posíbel que neste caso se estean a incumprir de xeito taxativo o Pacto Internacional de Dereitos Civís e Políticos e o Convenio de Dereitos Humanos, que establecen, ambos, que toda persoa debe ser informada á maior brevidade posíbel dos motivos da súa detención, así como de todos os seus dereitos para poder impugnar a mesma. Xulguen vostedes. O Defensor del Pueblo, Ángel Gabilondo, acaba de dirixir unha carta ao seu homólogo polaco na que esixe explicacións sobre o caso do xornalista español, porque ademais existen serias e graves evidencias de que as condicións do encarceramento e o trato que está a recibir en prisión Pablo González "lle están a provocar problemas de saúde, deteriorando o seu estado tanto físico como psíquico".
Polonia. Democracia europea. Ano 2023. 37 anos despois da adhesión do Estado español á Unión Europea.