ESTÁ ben o de reducir a mil euros o pago en efectivo para evitar fraudes; ínfimas, iso si, en comparación coas millonarias, as que se producen apoiadas en potentes equipos de asesores fiscais, as organizadas a través de paraísos ou as concretadas con tramas ben estruturadas ás que dificilmente poden acceder as economías domésticas. Certamente o desembolso en metálico debería reducirse ao máximo, aínda que existen profesións nas que os pagos con tarxeta aínda son excepción. Pero rebaixar a cantidade só atenúa levemente o problema. A súa eficacia é limitada e apenas representará un minúsculo bocado na tallada dos 40.000 millóns que como mínimo se calcula é o montante anual da fraude. Os métodos ata agora amosáronse ineficaces, porque se dirixen preferentemente ao pequeno tributante en vez de aos que deberían ser grandes cotizantes. Aí habería que dirixir o foco.
