Opinión

Cuestión de amizades

O MUNDO funciona por amizades, oficialmente chamadas relacións internacionais. Practicamente téñenas todos con todos en maior ou menor querenza, raros son os Estados tan herméticos que desprezan o resto e mínimos os que os dominadores do planeta non lles permiten manter todo o contacto exterior desexado. E as amizades fraguan a alta política. Historicamente España e Marrocos dinse amigos, pero este reino africano é máis aliado de Francia e agora de Estados Unidos, sobre todo desde que o reino alauíta restableceu relacións diplomáticas con Israel a cambio de que Trump, pouco antes de deixar a Casa Branca, recoñecera a soberanía marroquí sobre o Sáhara. E se eres amigo de Marrocos parece que non podes selo da excolonia española, porque se axudas a un dos seus dirixentes cabreas a quen considera seu ese territorio e o ten apropiado desde hai 45 anos. Amizades interesadas para ser máis poderoso. Con algunhas hai que coidarse.

Comentarios