Di Feijóo que España necesita recuperar a comunicación entre PSOE e PP. Desexo que seguramente non se verá cumprido porque as pontes están rotas, e non se espreitan enxeñeiros que as reconstrúan, por ningunha das dúas partes. Nin para algo que marca a Constitución, en aparencia tan legalistas como son ambos os dous, se poñen de acordo e o Poder Xudicial encamíñase a tres anos sen renovación, para satisfacción popular, porque segue mantendo a mesma maioría que cando gobernaba Rajoy. É un dos retos da nova ministra de Xustiza. E nin sequera os dous principais partidos son quen de ir a unha para a chegada dunha chuvia de millóns europeos encamiñados á recuperación e mentres uns se afanaban en lograr engrosar a cifra outros entorpecíana. A pesar da fenda que os separa, e máis que achicarse parece ensancharse, hai zonas de pasarelas que levan á outra beira sen risco de caer na sima, pero non hai vontade de andar por elas.
