PODEMOS e ERC son, digamos, incómodos para os demais partidos, incluso para o que goberna co primeiro grazas ao segundo e algúns máis. Por iso reciben ataques desaforados desde distintos sectores, non só políticos, senón tamén empresariais ou mediáticos, sobre todo destes, arietes as máis das veces dos outros. Estas arremetidas non son sempre de xeito legal. Contra dirixentes podemitas a chamada policía patriótica de gobernos anteriores elaborou informes falsos filtrados a periodistas para que se fixeran públicos coa fin de dinamitar o partido e hai pouco transcendeu a espionaxe o pasado ano a políticos independentistas cataláns. Como se contra os molestos valera todo, e iso non di moito da calidade democrática dun país, igual que cando desde as estruturas do Estado se crearon os GAL para acabar con Eta. Non se pode atacar o ilícito desde a ilegalidade, aínda que xa se sabe que os servizos secretos de todos os países bordean ás veces o prohibido.
