NUNCA É un bo día para regularizar a situación con Facenda, pero o peor foi o que transcendeu a solicitude do Rei emérito, o que se celebraba a Constitución que lle permitiu exercer a xefatura do Estado durante catro décadas dun xeito inviolable, igual que agora lle acontece ao seu sucesor, que o é en virtude de ser home, porque así o recolle a Carta Magna en detrimento doutros familiares. O artigo 56.3 recolle que o monarca non está suxeito a responsabilidade, exento de dar conta de calquera tropelía que poida cometer. Esta anomalía que pouco di a favor da calidade democrática dun país mantense porque nestes 44 anos de vixencia da lei suprema o Parlamento non foi quen de subscribir un acordo para abolir esta parte, como moitas outras obsoletas. Se non é capaz sequera de pactar a renovación do Consello Xeral do Poder Xudicial (lóxico que o PP non acepte porque así mantén maioría nel) menos aínda pode chegar a un acordo sobre a Constitución.
