OS REPRESENTANTES públicos, individual ou colectivamente, como militantes de partido, deputados, ministros ou cargos intermedios, non deberían ter nada que ocultar. Pero parece que si. Senón, non se entende que o PP intentase bloquear no Congreso a investigación sobre o seu presunto financiamento ilegal. Se ten as contas tan claras, debe ser o partido máis interesado en que se saiban, para así ondear a bandeira da transparencia. E obstrución entre PP e PSOE é o que leva ocorrendo desde hai case catro anos tras o accidente de Angrois. Os dous partidos, xuntos nisto, non admiten ningunha indagación cada vez que un terceiro require movemento nese sentido. É posible que estea todo cristalino, pero con esa conivencia a sensación que dá é a de apoio mutuo entre sombras compartidas. O contrario sería clarificador, e eles deberían promovelo, se non teñen nada que ocultar.
