SON DEFENSORES os partidos emerxentes de recortar en asesorías, eses postos destinados a militantes do partido gobernante algunhas veces para exercer o control político e outras non se sabe moi ben que. Perdón, si se sabe, nalgúns casos é para que afíns cobren das institucións cada mes sen apenas achegas laborais. E por España adiante hai centos deles así, porque por aí apenas houbo cercenamentos, eses viñeron por outras partes. Pero agora parece que xorde outra figura impagable, que non cobra por asesorar. Nada máis saído do cárcere, quizais porque tanto tempo entre rexas permitiulle ler máis nun ano que nos 60 anteriores, Ortega Cano aconsella a Pedro Sánchez na súa difícil tarefa de enfocar os pactos políticos. O que botamos de menos é algunha lección de seguridade vial. Pero todo se andará. E de aí a contertulio, pero non en Salvame deluxe, que sería o seu, senón no político Al rojo vivo.
