A voz da riqueza patrimonial de Caldas

Caldas de Reis está lonxe de ser o concello máis grande da provincia, pero iso non lle impide contar cunha riqueza patrimonial, cultural, lúdica e histórica que podería ser a envexa de vilas de maior entidade. Augas termais, petroglifos, a pegada romana ou os vestixios da transición cara a Idade Media forman parte deste gran tesouro.

Precisamente, co obxectivo de fomentar o coñecemento destes valores tanto do propio municipio como da bisbarra presentouse en sociedade a Asociación Terra Calda a principios deste ano. O colectivo, iniciado como agrupación veciñal algo máis dun ano antes, divulga e defende a posta en valor e a promoción de todo o que ten que ver coa evolución, a paisaxe e a tradición caldense, algo que leva a cabo a través dunha ampla variedade de actividades e propostas que están a obter unha gran resposta por parte da cidadanía.

A directiva fai un balanzo moi positivo do labor levado a cabo ata o de agora. "Hai moita participación e, ademais, tamén se nos achegan comentarios, ideas e valoracións que nos motivan a continuar traballando", apuntan desde Terra Calda. Os e as dirixentes agradecen esa "resposta cultural activa" por parte dos veciñas e veciñas de Caldas de Reis.

"Tiñamos a sensación de que existía unha demanda de actividades de temática local que servisen para contar a historia de Caldas. Nós o que facemos é intentar cubrir ese baleiro e, por sorte, todo o que estamos a propoñer está a ser recibido con moito interese", sinalan desde a asociación.

Unha das cuestións nas que afonda Terra Calda é na posta en valor da historia da Fábrica da Luz, da que se veñen de cumprir 125 anos desde a súa inauguración. O colectivo organizou, hai poucas semanas, unha mesa redonda coa participación de persoas expertas na xestión deste tipo de infraestruturas patrimoniais. A iniciativa foi un éxito e serviu para extraer conclusións interesantes. "A actuación de recuperación que se faga debe ser mínima, sen demasiada intervención, priorizando a a consolidación do inmoble e tendo en conta os usos que se lle pretende dar no futuro. Podería ser un espazo sensorial no que a luz e o son xoguen un papel esencial, integrando os usos lúdicos na súa contorna", apunta a directiva dad Asociación Terra Calda, que tamén incide na necesidade de reforzar a sinalización e aproveitar edificacións e áreas próximas para desenvolver obradoiros formativos ou dar vida a un centro de interpretación.

Conmemoración do 85 aniversario do descubrimento do Tesouro de Caldas

A agrupación traballa na organización dun evento para conmemorar o 85 aniversario do descubrimento do Tesouro de Caldas. "Probablemente é o máis importante da Prehistoria europea e que foi localizado nas Silgadas en decembro de 1940", recordan os responsables da asociación, que, de cara a 2026, tamén apostan por poñer en valor a figura do rei Alfonso VII. O lanzamento dunha páxina web, a recollida de información sobre Memoria Histórica ou a preparación dunha guía sobre os nomes das rúas caldenses son outros proxectos en marcha.

A asociación confía en que  as súas iniciativas se consoliden no futuro. Para iso, unha cuestión chave é consolidar o relevo xeracional, algo que tamén vai polo bo camiño. "Varios dos novos socios e socias da agrupación son xente moza que, ademais do seu interese polos temas que tratamos, tamén están tomando a iniciativa en cuestións como o emprego das novas tecnoloxías, a creación da páxina web ou a xestión das redes sociais", explica a directiva.  A voz do pasado e das riquezas patrimoniais de Caldas de Reis goza, polo tanto, de moi boa saúde nestes primeiros meses de aventura.