Poio construirá unha pista de atletismo na Reiboa para ser "referente deportivo"
Seis rúas e unha soa cola ao redor do campo de fútbol da Reiboa. Así será a futura pista de atletismo de Poio, un ambicioso proxecto que o Concello anunciou este sábado, e que contará cun investimento total de 183.984,96 euros.
Trátase de dar cumprimento a unha crecente demanda veciñal e de "consolidar Poio como un referente deportivo na comarca e na provincia, cunha estratexia clara de apoio ao deporte e aos nosos clubs, que son un orgullo para todos os veciños". Así o indicou o alcalde, Ángel Moldes, que deu conta dun proxecto que estará financiado con cargo ao Plan Extraordinario de Infraestruturas Deportivas da Deputación de Pontevedra, e que conta co interese dos clubs locais, ademáis de ampliar e diversificar a oferta deportiva municipal, dotando á contorna da Seca dunha instalación moderna, versátil e preparada para o adestramento e a competición para atletas de toda a comarca.
O alcalde quixo destacar que "a aposta deste Goberno polo deporte e polas infraestruturas modernas e de calidade é unha realidade palpable. Queremos que Poio dispoña dunha pista de atletismo á altura dos seus deportistas e do potencial que ten o noso municipio".
O proxecto contempla traballos de demolicións e movementos de terras, a instalación dun sistema de drenaxe mediante canaletas de recollida de pluviais, así como a pavimentación, marcaxe e sinalización correspondentes segundo as normas de homologación deportiva. Segundo explicou Moldes, o obxectivo é acadar o uso deportivo da pista en condicións óptimas, á espera de completar a actuación cun pavimento de tartán que permita acadar a homologación oficial da Real Federación Española de Atletismo (RFEA) conforme aos estándares da World Athletics.
Moldes tamén quixo salientar o traballo constante desenvolto nos últimos dous anos para mellorar e modernizar as instalacións deportivas municipais: "Melloramos as condicións do ximnasio municipal, renovamos os vestiarios dos campos de fútbol, construímos unha pump track, substituímos a cuberta da nave de piragüismo e actualmente estamos a executar unha nova pista multideporte en Vilariño. Estamos dando resposta a reclamacións históricas e moi necesarias", dixo.
Estas actuacións reforzan o compromiso do Concello co deporte base e coa organización de eventos deportivos de primeiro nivel, que atraen cada vez máis participantes e visitantes ao municipio, salientou o alcalde.
